Article Vote	1 2 3 4 5	Current Rating

"Nou kan hulle niemand meer seer maak nie ..." So het me. Chantel Fogwell, dogter van die vermoorde mev. Ria Pretorius, gesê ná beide haar ma se moordenaars tot lewenslange gevangenisstraf in die Polokwane Hooggeregshof gevonnis is.

Mev. Pretorius, ´n bekende sakevrou van Levubu, se koelbloedige moord in Januarie 2007 het skokgolwe deur die Levubu en Louis Trichardt gemeenskappe gestuur.

Net twee weke na haar moord is Phophi Budeli Mudau (40) en Tshilangano Jeffrey Mudau (35) in hegtenis geneem, nadat hulle ook Idris Hussain en Ismael Patel van Dzanani met ‘n vuurwapen aangehou en beroof het. ‘n Groot bedrag geld en ‘n bakkie is buitgemaak.

Danksy knap speurwerk van die polisie is eers hulle en toe later ‘n derde medepligtige aangekeer.

Die derde rower, wat in die kriminele wêreld as Snowy bekendgestaan het, is egter deur die polisie doodgeskiet, nadat hy hom teen arrestasie verset het. Dit het later aan die lig gekom dat hy ook verbind is met die gewelddadige gewapende aanval op die Marcos-egpaar van Louis Trichardt.

Tydens die twee se hofverskynings het die verhaal ontvou hoe die twee, saam met Snowy, vooraf ooreengekom het om mev. Pretorius te beroof en dood te skiet.

Phophi, wat in die hof beskryf is as die meesterbrein van die bende, sou die slagoffer en perseel uitwys, terwyl Jeffrey die wegkom-motor sou bestuur en Snowy die wapens en ammunisie sou verskaf. Phophi was goed bekend met mev. Pretorius se Levubu Bottelstoor en het selfs ‘n rekening daar gehad.

Op 2 Januarie 2007 het hy en sy bende na die winkel gegaan onder die dekmantel dat hy sy rekening sou betaal. Hulle het toe gewag totdat mev. Pretorius die winkel verlaat om voorraad aan te koop en haar toe agternagesit.

Sowat 2km buite Louis Trichardt het hulle haar van die pad afgetrek, haar verskeie kere geskiet en met ‘n groot hoeveelheid kontant spore gemaak.

Phophi en Jeffrey het verskyn op twee klagte van roof met verswarende omstandighede, een klag van moord, twee klagte van die besit van ‘n onwettige wapen en een klag van die besit van onwettige ammunisie. Beide is Donderdag, 15 Julie skuldig bevind op al ses klagte en albei tot lewenslange (25 jaar) gevangenisstraf gevonnis. Die twee is ook elkeen ´n verdere 15 jaar gevangenisstraf opgelê op die klag van roof met verswarende omstandighede en nog drie jaar op die klag van die besit van ‘n onwettige vuurwapen en ammunisie.

Jeffrey is tot ‘n bykomende 15 jaar gevangenisstraf gevonnis vir die klag van roof op die Patel-broers en drie jaar vir die besit van ‘n onwettige vuurwapen. Phophi is nie gevonnis op hierdie twee klagte nie, omdat die hof nie kon bewys dat hy fisies daardie dag betrokke was by die roof nie.

Tydens sy uitspraak het Regter G. Webster gesê dat die Staat sy saak bo redelike twyfel bewys het en dat veral Phophi nie werklik berou getoon het vir sy dade nie en slegs berou getoon het toe hy wou onderhandel vir ´n ligter vonnis.

No additional Photos attatched to this article

No additional Files attatched to this article