Angs na skote klap

Grootskaalse paniek het verlede Woensdag geheers by Makhado Crossing toe verskeie skote afgevuur is tydens ‘n gewapende roof by Pick n Pay.

Alhoewel dit nog redelik vroeg in die oggend was, was die sentrum reeds baie besig, met talle pensioenarisse wat onder meer by die OTM'e net voor Pick n Pay se ingang gewag het om hul SASSA-pensioene te trek.

Omstreeks 09:00 het ‘n man by Pick n Pay ingestap en homself voorgedoen as ‘n kliënt. Oomblikke later het hy ‘n pistool uitgepluk en ‘n geldsak by een van die winkel se vroulike personeellede gegryp. Die man het ‘n skoot in die lug afgevuur en na die agterkant van die winkel gehardloop om by een van die afleweringsdeure uit te kom. Hy het hom egter vasgeloop teen ‘n sekuriteitswag en ‘n worsteling het ontstaan. Nadat die rower nog twee skote afgevuur het, kon hy daarin slaag om uit te hardloop en weg te kom in ‘n silwer Ford ST wat agter die gebou gewag het. “Die man het weggekom met ‘n onbekende bedrag geld en niemand is in die voorval beseer nie,” het plaaslike polisiewoordvoerder konst. Irene Radzilane kort ná die voorval gesê.

Alhoewel niemand seergekry het nie, beteken dit nie dat omstanders nie groot geskrik het nie. Dit was die geval by die nabygeleë Makhado Good Health Apteek, waar assistent aptekers mnre. Taki Mashau en Mpho Mahafha vinnig moes dink. Met die klap van die eerste skoot het hulle onmiddellik die apteek se deure toegepluk. “Ons het die pensioenarisse by die OTM'e baie jammer gekry, maar dit was nie veilig om ons deure oop te maak vir hulle nie,” het Mashau gesê. “Die arme mense het nie geweet waar om te hardloop nie. Hulle het paniekerig heen en weer gehardloop en van hulle het op die grond neergeslaan in ‘n poging om weg te kom,” het Mashau bygevoeg.

Toe het nog twee skote geklap. “Ons het ons deure vir twee-en-‘n-half ure toegesluit gehou, want ons wou seker maak ons kliënte is veilig,” het Mashau gesê.

Die gewapende roof sou nie die enigste drama wees wat verlede week by Pick n Pay ontvou het nie.

Skaars 24 uur later het personeel die oggend van 2 Augustus opgemerk dat iemand deur die nag by die winkel ingebreek en ‘n groot hoeveelheid kontant uit die kontantkantoor gesteel het. Provinsiale polisiewoordvoerder kol. Moatshe Ngoepe het kort ná die voorval gesê niemand weet hoe die rowers toegang tot die winkel gekry het nie.

Tog blyk dit dat die polisie betroubare leidrade gehad het om op te volg, want hulle kon Maandag daarin slaag om twee verdagtes, ‘n 28- en 'n 30-jarige man, in verband met die inbraak aan te keer. Ngoepe het Dinsdag gesê dat die twee mans op die N1 noord buite Louis Trichardt aangekeer is en dat hulle binnekort in die landdroshof op Louis Trichardt sou verskyn. Op ‘n vraag of die twee mans verbind kan word met die gewapende roof van 1 Augustus, het Ngoepe gesê dat die polisie dit nie in daardie stadium kon bevestig nie, maar dat die moontlikheid deel sou vorm van hulle ondersoek.

Teen Woensdagoggend het die twee verdagtes steeds nie in die hof verskyn nie. By navraag oor wanneer die twee mans sou verskyn, het Ngoepe gesê dat die polisie steeds besig was met hul ondersoek ten opsigte van die mans se moontlike betrokkenheid by ander misdade. Volgens hom het hulle hierdie inligting nodig voordat die mans in die hof verskyn, aangesien hulle enige borgaansoek gaan teëstaan.

News - Date: 13 August 2018

Jo Robinson

Jo joined the Zoutpansberger and Limpopo Mirror in 2018 pursuing a career in journalism after many years of writing fiction and non-fiction for other sectors.

Email: [email protected]