Wonderbaarlik is niemand ernstig beseer nie in die brand wat ontstaan het nadat ’n vragmotor Vrydagaand binne-in die winkelkompleks by die Baobab-vulstasie op Bokmakierie ingejaag het.

Die eienaar van die vulstasie, mnr. Johan van Eeden, het ná afloop van die dramatiese gebeure vertel wat presies die aand plaasgevind het. Net ná 23:00 het ‘n vragmotor van die Tshipise-pad se kant bo-oor die stopstraat waar die pad met die N1 aansluit, gejaag. Hoekom die bestuurder van die vragmotor nie gestop het nie, is onduidelik.

Die vragmotor, met ’n vol vrag tamaties, het deur die versperrings langs die N1 gejaag, deur die vulstasie se ryvlak tot binne in die Fresh Stop winkel van die kompleks. ’n Petrolpomp is in die proses omgery, met die brandstof in die pomp wat dadelik aan die brand geslaan het. “Gelukkig het die shutter valve dadelik toegemaak soos hy moes en verhoed dat die brand na die ondergrondse opgaartenk kon versprei,” het Van Eeden gesê.

Die nasleep van gebeure nadat 'n vragmotor met 'n vol vrag tamaties net ná 23:00 Vrydagaand oor die Tshipise-pad se aansluiting met die N1 by Bokmakierie gebars het, binne-in die Baobab-vulstasie se winkelkompleks in. Met die slag het die vragmotor en kompleks aan die brand geslaan. Wonderbaarlik is niemand dood of ernstig beseer in die traumatiese insident nie. Foto verskaf.

Die harde slag waarmee die vragmotor deur die versperrings langs die N1 gejaag het, het gelukkig sekondes se vroeë waarskuwing aan die personeel by die vulstasie gegee om uit die pad te kom. “Die sekuriteitswag het vir my gesê hy het dadelik besef hier kom ’n ding!” het Van Eeden gesê. Die personeel in die winkel het na die agterkant van die winkel gehardloop en kon nadat die winkel in vlamme uitgebars het by die kompleks se agterdeur uitglip.

Die geweld van die impak het die vragmotor se kajuit afgeruk en dié het op die ryvlak beland, met die bestuurder en ’n passasier daarin. Wonderbaarlik het hulle dus ook die vlamme vrygespring, met slegs die vragmotor se enjin- en onderstel-gedeelte wat die winkel ingeploeg het.

Die geweld van die impak het die vragmotor se kajuit afgeruk, en dié het op die ryvlak beland met die bestuurder en 'n passasier daarin. Foto verskaf.

Bestuurders Alwyn Burger en Johan van Eeden (jr.), wat reg agter die kompleks op die perseel inwoon, het hulle te midde van die chaos na die toneel gehaas en dadelik ’n koptelling van die personeel gehou. Een personeellid was vermis en Burger en Van Eeden (jr.) is ingelig dat die personeellid te midde van die vlamme in die yskas gaan skuiling soek het. “Ek moet sê, dit was baie heldhaftig van Alwyn en Johan om die brandende winkel in te hardloop en die personeellid veilig te gaan uithaal,” het Van Eeden gesê en bygevoeg dat hy baie dankbaar is teenoor die twee vir hulle heldedaad.

Volgens Van Eeden was nooddienste vinnig op die toneel om te help, grootliks te danke daaraan dat hulle reeds op roep uit was op ander tonele. “Daar was Vrydagaand drie ongelukke in daardie omgewing. Ons het net ná middernag op die ryvlak gestaan, toe sien ons daar jaag die nooddienste weer verby,” het Van Eeden gesê. Wat dit betref het hy ook sy dank uitgespreek teenoor al die nooddienspersoneel wat so vinnig kom help het vanaf Vhembe, Musina en Makhado.

“Waaroor ons die blyste is, is dat almal oraait en lewendig daar uitgekom het,” het Van Eeden gesê. Hy het ook verwys na die bestuurder van die vragmotor, wat feitlik ongedeerd uit die kajuit geklim het. Sy passasier het egter ’n voetbesering opgedoen. “Dankie aan al ons personeel wat gehelp het en ons wens julle sterkte toe. Die hele ervaring was erg traumaties vir hulle gewees,” het Van Eeden gesê.

Teen Maandagoggend het Van Eeden-hulle gewag vir die assessors en ingenieurs om bestek te kom opneem van die skade. “Die hele kompleks is toegemaak. Dit was nie gebrand het nie, het rookskade gekry en sal ook afgeskryf moet word. Wat die struktuur betref, sal die ingenieurs eers moet kyk,” het Van Eeden gesê. Hy kon derhalwe geen voorlopige skade-beraming gee nie. Wat wel duidelik is, is dat hulle nie vinnig weer sal kan oopmaak nie, veral nie die winkelkompleks nie. “Dit gaan maande vat om die skade te herstel,” het Van Eeden gesê.

Alhoewel die winkelkompleks en petrolpomp-gedeelte vir die afsienbare toekoms gesluit sal wees, het Van Eeden gesê dat hulle steeds hulle dieselkliënte sal kan help. “Ons gaan die truck stop gedeelte oophou,” het hy gesê.